啱啱去買咖啡，因為銀包關係，感應唔到八達通，我攞咗張八達通出嚟doot，望住呢張咭，百感交集。
人生只係擁有過兩張八達通，第一張係普通小童版，跟住好似係2008左右，我知道八達通有個特別企劃叫「叱咤20周年紀念八達通」，搵咗商台上上下下前前後後嘅人設計，我當時其實最想買《買兇拍人》個頭斬咗落嚟嗰張，不過買唔到，最尾就買咗林夕設計呢張，當時記得佢講過呢個設計係源自「叱吒」嘅火炬，去日本見到個指示牌幾靚影咗落嚟，最後就係煙花。
12年後，夕爺都搬咗去台灣，「叱吒」冇現場，去唔到日本見「到着」打卡，煙花就更加唔使講。
唯一不變嘅，就係我一路換咗幾次銀包都好好保存嘅呢一張八達通。
有人曾經同我講過，如果你真正愛一樣嘢，你就無論如何都會用盡你所有辦法去保護佢，唔單只係人，哪怕係一個手袋、一支唇膏、一個口罩。
屎忽痕上網睇吓究竟仲搵唔搵到當時嘅官方介紹，原來夕爺話：
「叱吒之火，發光發熱。
機場內常見的指示牌，給我們選擇方向的自由，飛翔於流行文化世界，帶我們上摩天輪宏觀青青蔥歲月。」
12年後，唔知呢張八達通仲會唔會喺度，又或者，「八達通」自己仲會唔會喺度，但我相信只要你好愛好愛一樣嘢，用心去「栽培」佢，好似種花咁，就算就嚟凋謝都總可以絕處逢生，綻放異彩。
Search